سعودی عرب کو سی پیک میں تیسرے ساتھی کے طور پر شراکت کی دعوت دی ہے۔ فواد چوہدری

پاک چین اقتصادی راہداری میں سعودی عرب بھی سرمایہ کاری کرے گا جس کیلئے پاکستان کی جانب سے اسے باقاعدہ دعوت دی گئی ہے۔

اسلام آباد میں پریس کانفرنس کے دوران وفاقی وزیر اطلاعات فواد چوہدری نے کہا کہ سعودی عرب کو سی پیک میں تیسرے ساتھی کے طور پر شراکت کی دعوت دی ہے جبکہ خادم حرمین شریفین کی تجویز پر اعلیٰ سطح کی کمیٹی قائم کی گئی ہے۔

انہوں نے کہا کہ اکتوبر کے پہلے ہفتے میں ایک معتبر وفد سعودی عرب سے پاکستان آئے گا جس میں سعودیہ کے وزیر خزانہ اور وزیر توانائی شامل ہوں گے۔

فواد چوہدری کے مطابق سی پیک میں تیسرا اسٹریٹجک پارٹنر سعودی عرب ہوگا اور سعودیہ سے بڑی سرمایہ کاری ہوگی جبکہ جو معاہدے ہوں گے شفاف اور واضح ہوں گے۔

ان کا کہنا تھا کہ سعودی عرب کو یقین دلایا ہے کہ سیکیورٹی کے معاملات میں مدد کریں گے۔

وفاقی وزیراطلاعات نے وزیراعظم کے دورۂ سعودی عرب سے آگاہ کرتے ہوئے کہا کہ سعودی عوام نے وزیراعظم عمران خان کا پرتپاک استقبال کیا اور سعودی ولی عہد نے یقین دلایا کہ سعودی عرب پاکستان کے ساتھ کھڑا ہے جب کہ عمران خان نےکہا کہ سعودیہ کی سیکیورٹی کا تحفظ پاکستان کی سیکیورٹی کا تحفظ ہے۔

ان کا کہنا تھا کہ پاکستان کی سعودی عرب اور یو اے ای سے تعلقات میں گزشتہ چند سالوں سے سرد مہری تھی جو اس دورے سے ختم ہوئی ہے۔

فواد چوہدری نے کہا کہ متحدہ عرب امارات میں طویل مشاورت ہوئی ہے اور سعودی عرب کے بعد یو اے ای سے بھی ویزہ شرائط میں نرمی پر بات ہوئی ہے۔

انہوں نے کہا کہ اکتوبر میں متحدہ عرب امارات سے بھی اعلیٰ سطح کا وفد آئے گا جبکہ کراچی میں پانی کی ترسیل کے حوالے سے یو اے ای سے بات کی جائےگی۔

وزیراعظم کی جانب سے اپنے بھارتی ہم منصب کو لکھے گئے خط بارے ایک سوال کے جواب میں ان کا کہنا تھا کہ خوشی ہے مذاکرات کی پیش کش پر بھارت کا مثبت جواب آیا ہے۔