پاک امریکہ وزرائے خارجہ کی ملاقات، دو طرفہ، علاقائی اور عالمی امور پر تبادلہ خیال

پاکستان نے امریکہ پر زور دیا ہے کہ دونوں ممالک کے درمیان تعلقات باہمی اعتماد اور احترام کی بنیاد پر ازسرنو بحال کیے جانے چاہئیں۔

ترجمان دفتر خارجہ ڈاکٹر محمد فیصل کے مطابق پاکستان کے دورے پر موجود امریکی وزیر خارجہ مائک پومپیو دفتر خارجہ پہنچے جہاں وزیر خارجہ شاہ محمود قریشی نے ان کا استقبال کیا۔

امریکی وزیر خارجہ کے ہمراہ امریکی فوج کے چیئرمین جوائنٹس چیف آف اسٹاف جنرل جوزف ڈنفورڈ، محکمہ خارجہ اور سفارتخانے کے حکام بھی موجود تھے جبکہ پاکستانی وفد کی قیادت شاہ محمود قریشی نے کی اور سیکرٹری خارجہ تہمینہ جنجوعہ بھی ان کے ہمراہ موجود تھیں۔

ڈاکٹر محمد فیصل نے کہا کہ دونوں ممالک کے درمیان وفود کی سطح پر مذاکرات ہوئے جس میں دو طرفہ، علاقائی اور عالمی امور پر تبادلہ خیال کیا گیا۔

https://twitter.com/ForeignOfficePk/status/1037282359001931778

ترجمان کے مطابق وزیر خارجہ شاہ محمود قریشی نے باہمی اعتماد اور احترام کی بنیاد پر پاک امریکا تعلقات کو ازسرنو بحال کرنے کی ضرورت پر زور دیتے ہوئے کہا کہ پاکستان کے قومی مفادات کا تحفظ کرنا نئی حکومت کی اولین ترجیح ہے۔

خیال رہے کہ امریکی وزیرخارجہ ایک روزہ دورے پر پاکستان آئے ہیں جہاں اپنے ہم منصب کے علاوہ انہوں نے وزیراعظم عمران خان اور آرمی چیف جنرل قمر جاوید باجوہ سے بھی ملاقات کی۔

پاکستان کے اعلی حکام کے ساتھ ملاقات کے بعد وہ بھارت جائیں گے۔

قبل ازیں پاکستان آمد سے قبل میڈیا سے گفتگو میں امریکی وزیر خارجہ مائیک پومپیو کا کہنا تھا کہ پاکستان کی جانب سے  متوقع  پیشرفت نہ ہونے پر امداد بند کی گئی تاہم امید ہے پاکستان اور امریکا ماضی کو پیچھے چھوڑ کر نئی پیشرفت کا آغاز کریں گے۔

مائیک پومپیو نے حکومت پر زور دیا کہ پاکستان افغانستان میں ثالثی کے لیے تعاون کرے۔

امریکی وزیر خارجہ نے کہا کہ پاکستان اورامریکا کو بہت سے مشترکہ چیلنجز کا سامنا ہے لہذا پر امید ہیں کہ نئی پاکستانی قیادت  کے ساتھ مل کر مشترکہ مسائل حل کرنے کے لیے کام کیا جاسکے گا۔