بنوں: نرس خودکشی کیس، عدالت کا قبر کشائی اور دوبارہ پوسٹ مارٹم کا حکم

احسان اللہ خٹک

بنوں کے خلیفہ گل نواز ہسپتال کی نرس کی مبینہ خودکشی کے معاملے میں اہم پیش رفت سامنے آئی ہے، مقامی عدالت نے نرس کی موت کے اصل اسباب جاننے کے لیے قبر کشائی اور دوبارہ پوسٹ مارٹم کا حکم دے دیا ہے۔

عدالتی حکم کے مطابق قبر کشائی 26 جون 2025 کو دوپہر 12 بجے کی جائے گی، جس کے بعد نرس الفت نور کا دوبارہ پوسٹ مارٹم کیا جائے گا۔ اس مقصد کے لیے عدالت نے ویمن اینڈ چلڈرن ہسپتال کی تجربہ کار لیڈی ہیلتھ آفیسر کی خدمات حاصل کرنے کی ہدایت بھی جاری کی ہے۔

نرس کے ورثاء کی جانب سے عدالت میں درخواست دائر کی گئی تھی کہ ابتدائی پوسٹ مارٹم رپورٹ میں کئی ابہامات موجود ہیں اور ابتدائی تفتیش میں پوسٹ مارٹم کرنے والے ڈاکٹر سے کوئی تفصیلی پوچھ گچھ نہیں کی گئی تھی۔ متاثرہ خاندان کے وکیل سیف اللہ ایڈوکیٹ کا کہنا ہے کہ "انصاف کے تقاضے پورے کرنے کے لیے ازسرِنو میڈیکل جانچ ناگزیر ہے، تاکہ اصل حقائق سامنے آ سکیں۔”

عدالت نے قبر کشائی کے دوران امن و امان کو یقینی بنانے کے لیے ریجنل پولیس آفیسر (آر پی او) بنوں ڈویژن کو سکیورٹی کے سخت انتظامات کرنے کا بھی حکم دیا ہے۔

یاد رہے کہ نرس نے مبینہ طور پر زہریلی گولیاں کھا کر خودکشی کی تھی۔ الزام ہے کہ ہسپتال کے ایک ملازم کی جانب سے ہراسانی کا سامنا تھا جس سے تنگ آ کر نرس نے انتہائی قدم اٹھایا۔